Daryeel Caafimaad: Finanka Wejiga Sidee La Isaga Daweeyaa?

Finanka wejigu waa mid ka mid ah xanuunada maqaarka ku dhaca, kuwaas oo saameyntooda leh waxa la qiyaasay in 85% ay qofka maruun noloshiisa ay soo mari doonto ama ay soo maartay.

Calaamadahooda ayaa waxa ka mid ah finan cadho kugu abuura iyo cuncun, kuwan oo ay adag tahay inaad si sahlan meesha uga saarto.

Walaw ay jiraan dawooyin la saadaalinayo inay dawo ka noqon karaan finanka wejiga oo shaqaynaya awoodna u leh inay tirtiraan ama baabiyaan iyaga, haddana caadiyan waxa lala xidhiidhiyaa kuwo dhib keeni kara, sida maqaarka oo cun-cuna ama balala iyo qalayl ku yimaada maqaarka.

Tanina waa sababta ay dad badani ay ugu laabteen badalkeeda inay isticmaalaan hab dabiici ah oo xal u noqon kara finanka wejiga iyo maqaarka.

Waxaa jira dawooyin badan oo si dabiici ah finanka wejiga loogu tirtiri karo, waana kuwo kaa caawin kara oo la cadeeyey waxtarkooda, si dhakhso ahna meesha uga saari kara finanka wejiga.

1- Shaaha Cagaaran

Dad badan ayaa shaaha cagaaran u caba faa’idooyinkiisa caafimaad ee laga helo, balse sidoo kale wuxu leeyahay waxtaro kale oo badan, marka la mariyo si toos ah maqaarka gaar ahaan finanka.

Shaaha cagaaran waxa ku jira fla-vo-noids iyo tannins, kuwan waxa la og yahay inay kaa caawianayaan la dagaalanka bararka iyo bakteeriyadu ay u geystaan finanka maqaarka.

Waxa kale oo jira antioxidant, kuwaas oo ka hortaga bararka, waxaanay yareyaan soo saaritaanka saliida badan ee wejiga iyo koritaanka bakteeriyada ee Propioni-bacterium acnes taas oo keenta sabab u ah finanka maqaarka.

Daraasado badan oo la sameeyey ayaa la arkay dadka finanka wejiga leh isticmaalkiisa ka dib ay natiijo wacan ka soo baxday.

2- Aloe Vera

Waa geed ka baxa dhulka kulaylaha ah wuxu leeyahay caleemo kuwaas oo soo saara maado isjiidanaysa oo saafi ah.

Marka la mariyo maqaarka maadadan waxay la dagaalantaa bakteeriyada, waxay hoos u dhigtaa bararka, waxay sidoo kale dedejisaa bogsashada nabarada wejiga iyo maqaarka.

Wuxu ku caan baxay in loo adeegsado xaalado kala duwan kuwaas oo maqaarka la soo darsa waxaana ku jira oo ka mid ah, canbaarta, iyo gubashada maqaarka.

Aloe vera waa mid saameyn waxtar ah leh, marka la bar-bar dhigo dawooyinka maqaarka.

3- Zink

Macdanta Zinc waxay door wax ku ool ah ka ciyaartaa bogsashada iyo hoos u dhigida bararka finanka.

Waxa jira cilmi-baadhisyo ina tusaaya in dadka finanka wejiga leh ay suurtagal tahay in dhiigooda ay ku yar tahay macdanta zink marka loo eego dadka aan iyagu maqaarkoodu lahayn.

Waxa talooyin caafimaad lagu soo jeedinayaa in qofku uu qaato zinc 49mg maalintii.

4- Saliida Kaluunka

Saliida kaluunka waxa ku jirta Omega-3 fatty acids iyo Eicosapentaenoic acid.

Daraasado ayaa muujinaya inay hoos u dhigto saliida kaluunku, finanaka, kaana caaawin karto in maqaarku ahaado mid ka badqaba biyo yaraanta iyo fuuq baxa.

Daraasad kale oo ay ka qeyb qaateen 45 qof ayaa iyana hoosta ka xariiqday qaadashada saliida kaluunku ay hoos u dhigto finanka wejiga.

5- Habab Kale Oo Finanka Loo Daweyn Karo

Ø Caanaha: Daraasad ayaa soo tabisay in dadka caba caanaha badan ay yeeshaan finankawejiga iyo kuwa maqaarka.

Ø Malabka: Waxa ku jirta antioxidants, wuxu ka hortagaa bakteeriyada, iyo bararka finanka, wuxu u leeyahay faa’idin badan gaar ahaana dadka xanuunada maqaarka leh in la mariyo.

Ø Wal-walka: Waxa jira daraasado sheegaya in mar kasta oo xaalada walwalka ee qofku korodho ay halista finankuna ay sii korodho karto.